2012-12-13

13 dekabr tarixində MAGİYA ictimai birliyi Lənkəran şəhərindəki ofisində “Regionlardan olan gənclər üçün liderlik məktəbi” layihəsinin bitməsi ilə əlaqədar mətbuat konfransı təşkil etmişdir. Tədbirdə həmin layihənin məzunları da daxil olmaqla, 15 nəfərə yaxın KİV, hökumət, QHT və Gənclər təşkilatlarının nümayəndələri iştirak etmişdir. Tədbir zamanı təşkilatın nümayəndələri iştirakçılara “Regionlardan olan gənclər üçün liderlik məktəbi” layihəsi, onun uğurları və davamlı nəticələri barədə qısa məlumatlar vermişlər. Qeyd edilmişdir ki, Azərbaycan Respublikasının Gənclər və İdman Nazirliyinin yanında Gənclər Fondunun 4125 manatlıq maliyyə dəstəyi ilə həyata keçirilən layihənin müddəti 5 ay olmaqla, 01 avqust – 28 dekabr 2012-ci il tarixlərini əhatə etmişdir. Layihə çərçivəsində Lənkərandakı AB Qala otelində 20 nəfər gənc üçün liderlik mövzusunda 3 dəfə 2 günlük təlim kursları keçirilmişdir. Təlim kursunu uğurla bitirən iştirakçılara müvafiq sertifikatlar verilmişdir. Tədbir zamanı bəzi iştirakçılar layihə barədə müvafiq suallar vermiş və tədbirin sonunda qeyd etmişlər ki, gələcəkdə də, region gəncləri üçün bu cür maraqlı və faydalı layihələrin həyata keçirilməsi çox yaxşı olardı. Sonunda Azərbaycan Respublikasının regionlarından olan gənclərin liderlik bacarıqlarının artırılması istiqamətində göstərdiyi diqqət və dəstəyə görə hamı Gənclər və İdman Nazirliyinin yanında Gənclər Fonduna minnətdarlıq etdi.