2013-10-01

MAGİYA ictimai birliyi Lənkəranda “Özünü və ətrafdakıları HİV/AİDS və narkomaniyadan qoru!” adlı yeni bir layihənin həyata keçirilməsinə başlamışdır. Layihə 01 oktyabr – 27 dekabr 2013-cü il tarixlərini əhatə edəcəkdir. Layihə Azərbaycan Respublikasının Prezidenti yanında Gənclər Fondunun maliyyə dəstəyi ilə həyata keçirilir. Layihənin məbləği 5500 AZN təşkil edir. Layihənin məqsədi regionda narkomaniya və HİV/AİDS-ə qarşı mübarizədə gənclərin ictimai fəallığının artırılması, gənclərin sağlamlıq və sağlam həyat tərzi məsələləri barədə geniş maarifləndirilməsi və məlumatlandırılmasından ibarətdir. Layihə çərçivəsində Lənkəran, Masallı və Astara rayonlarının hər biri üzrə 18-29 yaş arası 25 nəfər gənc seçiləcək və onlar üçün Lənkəranda 30-31 oktyabr, Masallıda 06-07 noyabr və Astarada 13-14 noyabr tarixlərində 2 günlük təlim kursları keçiriləcəkdir. 04-05 dekabr tarixində isə keçirilən təlim kurslarında fəal iştirak etmiş gənclərdən hər bir rayon üzrə 10 nəfər olmaqla təşkilatçılar tərəfindən ümumilikdə 30 nəfər gənc seçiləcək və onlar üçün Lənkəranda “Təlimçilər üçün təlim” adlı zonal təlim kursu təşkil olunacaqdır. Eyni zamanda, təşkilatçılar tərəfindən zonal təlim kursunda iştirak edən gənclərlə Lənkəran Rayonlararası Narkoloji Dispanserin və Respublika QİÇS-lə Mübarizə Mərkəzinin Lənkəran Regional Laboratoriyasının mütəxəssisləri arasında müvafiq görüşlərin təşkil olunması da planlaşdırılır. Bununla yanaşı, layihə çərçivəsində həyata keçirilən tədbirlərin nailiyyətləri, nəticə və yekunu barədə 18 dekabr 2013-cü il tarixində Lənkəranda mətbuat konfransının təşkili də nəzərdə tutulmuşdur.